Gen 22 | PMA | STEP | Avong muli, Ahi vit vasak vis Ebraham. Sakini vise vit, “!Ebraham!” Ka Ebraham vit, “!O-o, inau ke li!”

Genesis 22

Ahi Vis Ebraham Vou Vin Natnali koa Aesak

Senesis 22:1-19

1 Avong muli, Ahi vit vasak vis Ebraham. Sakini vise vit, “!Ebraham!”

Ka Ebraham vit, “!O-o, inau ke li!”

2 Ahi viteni mini vit, “Kikur natmali kati koa Aesak, koa envatien onom mariso mul ien, ka kihina en atan ten out Moraiah. Ekonek en hou tai koa nitie minuk, ku vini ka kiniti hehi sanien tai onom minau.”

3 Sakini, out mulan, Ebraham ra ruain av, sak mesen tounah keil ka lingi en dongki sen. Kur Aesak ka meatin toumien onen elu telvita en out koa Ahi viteni mini. 4 Telmual va vio ... en avong etel teni, telles out koa Ahi vit kati mini mul soutin neli veah. 5 Navong lesi mukok, Ebraham viteni min meatin toumien keilu onen vit, “Milheto ekok hetal dongki ekek. Ehon ekek ka inau melheha en out ke va ekek, ka melheha netan min Ahi. Evus, melhemai ris ven kamil.”

6 Ebraham san av ten sanien min Aesak vousi, ka kei kur naef ka vatihang. Navong lumual ruai luva, 7 Aesak viteni min tata onen vit, “!Tata!”

Tata onen vit, “?Asa natkuli?”

Aesak visi vit, “?Nalesi lokur av ka ahang, ka sipsip koa lovaniti vahi sanien kave?”

8 Ebraham vit, “Ahi, kei varei hesani.” Ka keilu lumual ruai luva.

9 Navong lurokol out koa Ahi vit kati, Ebraham kur ahat keil, mumon ahor ten sanien eni ka ling av ien. Evus, par kat natnali ka lingi matil kat av keil nesa. 10 Evus, kahot lat naef onen vit vasal vini. 11 Ka hatte tas, angelo onen Iahova viso ka en out nesa vit, “!Ebraham, Ebraham!”

Ka kei vit risi vit, “O-o, inau ke li.”

12 “Konou vinitei ehon onom. Konoumontei tounah nasut natmali. Ekek nakilea keke keik kovouhou min Ahi ka kolong kati, veni keik kormutut kattei natmali ran Ahi, natmali kati koa tas koa vi onom.”

13 Ebraham lele ka les nani rendan koa meahos, hon verai mul en holeai tai. Sakini, luv lat viau ran Aesak ka va kur nani keke vakur vulin natnali. Muasi mat ka muniti suk vi sanien onen vina min Ahi. 14 Ebraham ling isen out enek vi 'Jehovah Jaerah' koa aneite teni vi 'Iahova sani'. Ka selusien koanik, meatin keil amul aviteni rokol kosa avit, “En hou onen Iahova, kei varei hesani.”

15 Angelo onen Iahova selus min Ebraham hatte elu vit, 16 “Ahi viteni mukok: 'Numon hatkatien hetal minuk en isok keke nitokol katuk hehi houlu mok veni keik kormutut kattei natmali ranau, natmali kati koa tas koa vi onom. 17 Navat kati keke nitokol katuk, numon vatiamal onom koa ikistal enuk ihi houlu vis ihi houlu mok isuval hitu ten teilang vuo isuval veien ten atas. Onom keil u vasi meatin keil koa avit avoumon rea vatal min keil. 18 Vatiamal onom keil ihi sise ten tokolkatien onak heha min vangi meatin vasi keil ten out netan. Koanek hehi sanien onak minuk veni kolong kat inau.” 19 Ebraham keilu natnali luva ris ven meatin toumien keilu onen. Ka telva ris en out koa amul ien koa avise en Bersiba, ka aro ien ral min one keil sua houlu.

Navong sua onen Serah rokol handred tai hanumau tai ka oulu mun (127), kei mat. Ebraham rangisi ka vit vatahini ka sakras ven atan kati onen tovuol. Sakini, vul titi atan ran meatin tai en out enek ka rahin ahin onen mul ien.

Sua etel muli, ka navong sua onen Aesak rokol hanumau elu (40), kei retalihe suk ral min ahin tai ten out Haran, isen Rebekah. Kei vi natin Nahor, tunali Ebraham. Rovitei tuetin, avu Ebraham mat ka titan keilu, Aesak ka Ismael, lurahini vesesal en out koa arahin Serah ien. Navong mat, sua onen Ebraham rokol handred tai, hanumau etel ka teindan elim emun (175).